ბათუმის საჯარო სკოლებში მოსწავლეთა თვითმმართველობების პოტენციალისა და შესაძლებლობების განვითარება

 ,,დემოკრატიის ინსტიტუტი“-ს ფინანსური მხარდაჭერით, ა(ა)იპ ,,ჩვენი თაობა“-ს მიერ    განხორციელებული იქნა პროექტი: ,,ბათუმის საჯარო სკოლებში მოსწავლეთა თვითმმართველობების პოტენციალისა და შესაძლებლობების განვითარება“. აღნიშნული პროექტის მიზანი გახლდათ ბათუმის ზოგადსაგანმანათლებლო საჯარო სკოლებში მოსწავლეთა თვითრეალიზაციისათვის აუცილებელი გარემოს შექმნა და სკოლის მართვის პროცესში მოსწავლეთა ჩართულობის ხარისხის ამაღლება, მოსწავლეთა თვითმმართველობების პოტენციალისა და შესაძლებლობების ზრდისათვის ხელშეწყობის გზით. პროექტი დაიწყო  2011 წლის 4 აპრილს და მიმდინარეობდა 3 თვის განმავლობაში.

     პროექტის ფარგლებში.  2 მაისიდან – 18 მაისის  ჩათვლით,  ბათუმის 18-ვე საჯარო  სკოლის მოსწავლეთა თვითმმარველობის წარმომადგენლებს ჩაუტარდათ ტრენინგი თემაზე: ,,მოსწავლეთა თვითმმართველობის ორგანიზაციული მართვის ძირითადი პრინციპები“.   ტრენინგის მონაწილეები გაიყოფა 2 ჯგუფად, საბაზო საფეხურის თვეთმმართველობების წარმომადგენელთა ჯგუფი (18 მონაწილე) და საშუალო საფეხურის თვითმმართველობების წარმომადგენელთა ჯგუფი (18 მონაწილე). თითოეულ ჯგუფთან ტრენინგი ცალ-ცალკე გაიმართება, თუმცა იმავდროულად მოეწყობა რამდენიმე გაერთიანებული შეხვედრაც.                      

     ტრენინგს წარუძღვა ტრენერი განათლების სფეროში მირანდა ჩარკვიანი და ტრენერი სამართლის სფეროში აბელ სალაძე. ტრენერმა განათლების სფეროში ყურადღება გაამახვილა ისეთ თემებზე, როგორებიცაა: საგანმანათლებლო სისტემაში მიმდინარე რეფორმები და მათი ანალიზი, მოსწავლეთა თვითმმართველობის რაობა და მისი ძირითადი ფუნქციები, მოსწავლეთა თვითმმართველობის სტრუქტურა და საქმიანობის ძირითადი მიმართულებები, ხოლო ტრენერმა სამართლის  სფეროში სალექციო კურსი ჩაატარა შემდეგ თემატიკაზე: ბავშვთა უფლებების სამართლებრივი ანოტაცია, განათლების შესახებ კანონმდებლობის მიმოხილვა და სკოლის მართვაში მონაწილეობა, როგორც მოსწავლის უფლება. ტრენინგ კურსის ერთი ნაწილი, კერძოდ კი შემდეგი საკითხები: ლიდერის პრაქტიკული უნარ-ჩვევები, ახალგაზრდული პროექტების შემუშავება და მართვა, მოსწავლეებთან ურთიერთობის ფორმები და მეთოდები, ვებ-რესურსები, როგორც კომუნიკაციისა და ინფორმაციის  გაშუქების თანამედროვე საშუალებები – წაიკითხა პროექტის შემსრულებელი ჯგუფის წევრებმა, პროექტის დირექტორმა ციალა ქათამიძემ და კოორდინატორმა ილია გუჩმანიძემ. ტრენინგის ფარგლებში განსაკუთრებული ყურადღება დაეთმო თემას: ახალგაზრდული პროექტების შემუშავება და მართვა, რომელიც ჩატარდა მოსწავლეთა გაერთიანებულ  შეხვედრაზე. მოსწავლეებს განემარტათ პროექტების წერის სპეციფიკა და პროექტების რეალიზაციის ორგანიზაციული მეთოდიკა. გარდა აღნიშნული თემისა მოსწავლეები გაეცნენ სხვადასხვა ფონდებს, რომლებიც ახალგაზრდულ პროექტებს აფინანსებენ. აგრეთვე ჩატარდა გაერთიანებული ტრენინგი თემაზე:  ,,ვებ-რესურსები, როგორც კომუნიკაციისა და ინფორმაციის  გაშუქების თანამედროვე საშუალებები“, სადაც მოსწავლეებმა შეისწავლეს ვებ-ბლოგების შექმნისა და მართვის წესები.

 

 

 გარდა თეორიული კურსისა ტრენინგის ფარგლებში ჩატარდა შეხვედრები სამთავრობო და არასამთავრობო ორგანიზაციების წარმომადგენლებთან, კერძოდ სახალხო დამცველის ბათუმის ოფისში შედგა შეხვედრა აჭარაში მოქმედი არასამთავრობო ორგანიზაციების ხელმძღვანელ პირებთან  და სახალხო დამცველის ბათუმის ოფისის თანამშრომლებთან. შეხვედრა წარიმართა კითხვა-პასუხის რეჟიმში და განხილული იქნა ისეთი საკითხები, როგორებიცაა: ადამიანის უფლებათა დაცვის სფეროში სახალხო დამცველის ინსტიტუტის მნიშვნელობა და არასამთავრობო სექტორის როლი სამოქალაქო საზოგადოების განვითარებაში.  

   

ტრენინგის მონაწილეები შეხვდნენ ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობის თავმჯდომარეს და გაეცნენ უნივერსიტეტში სტუდენტური თვითმმართველობის მუშაობის სტილს. 

  

თბილისიდან მოწვეულმა ექსპერტებმა გია ჟორჟოლიანმა და ბაქარ ბერეკაშვილმა მოსწავლეებს ღია ლექცია წაუკითხეს თემაზე – ,,საქართველოს ევროატლანტიკური ინტეგრაცია“. 

  

მოსწავლეები შეხვდნენ საქართველოს საკონსტიტუციო სასამართლოს პრეს-სამსახურის თანამშრომლებს, აღნიშნულ შეხვედრაზე დაიგეგმა და ერთი კვირის შემდგომ კი შედგა ექსკურსია საქართველოს საკონსტიტუციო სასამართლოში, სადაც მოსწავლეებმა დაათვალიერეს საკონსტიტუციო სასამართლოს სხდომათა დარბაზი და ასევე ,,მეფეთა დარბაზში“ შეხვდნენ საკონსტიტუციო სასამართლოს თავმჯდომარეს გიორგი პაპუაშვილს, რომელმაც მათ განუმარტა საქართველოს საკონსტიტუციო სასამართლოს მნიშვნელობა და საკონსტიტუციო სამართალწარმოების ძირითადი ასპექტები. 

 

   

გარდა აღნიშნული შეხვედრებისა ტრენინგის მონაწილეებისათვის მოეწყო ფილმის ჩვენებაც, ნაჩვენები იყო ლუკ ბესონის ფილმი ,,სახლი“,  რომლის შემდგომაც მოეწყო ფილმის განხილვა, ასევე ,,მეგობრობის სახლში“ ჩატარდა პოეზიის საღამო ბათუმში მოღვაწე ახალგაზრდა პოეტებთან ერთად, სადაც მოსწავლეებმა  საკუთარი ლექსებიც წაიკითხეს.

 

   

ამდენად ტრენინგი მოიცავდა ვრცელ თეორიულ და პრაქტიკულ კურსს, რომლის დასასრულს შეჯამდა ტრენინგის მიმდინარეობა და ყველა მონაწილეს გადაეცა სერტიფიკატები.

 

 

 ა(ა)იპ ,,ჩვენი თაობა“-ს  გამგეობის 1 ივნისის გადაწყვეტილებით, ტრენინგის მონაწილე ბათუმის 18-ვე საჯარო სკოლის მოსწავლეთა თვითმმართველობის წარმომადგენლებისაგან დაფუძნდება ბათუმის საჯარო სკოლების მოსწავლეთა თვითმმართველობების კლუბი ,,დარბაზი“, ხოლო 2 ივნისს მიღებული იქნა აღნიშნული კლუბის დებულება, რომლითაც განისაზღვრება კლუბის სტრუქტურა და საქმიანობის ძირითადი მიმართულებები. კლუბზე კურატორობა აიღო ა(ა)იპ ,,ჩვენი თაობა“-მ, რომელიც თავისი რესურსებით უზრუნველყოფს კლუბის შეხვედრების  ორგანიზებას და ფუნქციურ გამართულობას. კლუბი იქნება ერთგვარი ფორუმი, რომელიც უზრუნველყოფს ბათუმის საჯარო სკოლების მოსწავლეთა თვითმმარველობებს შორის ურთიერთთანამშრომლობის ეფექტური მექანიზმის შექმნას. თვითმმართველობებს ექნებათ კომუნიკაციის, ინფორმაციის გაცვლის და საერთო პროექტების დაგეგმვისა და განხორციელების საშუალება.

   პროექტის ფარგლებში შეიქმნა აღნიშნული კლუბის ვებ-გვერდი (www.generation.ge),  რომელზეც განთავსთდა ბათუმის საჯარო სკოლების მონაცემთა ბაზა, ბროშურა – ,,სახელმძღვანელო ცნობარი – მოსწავლეთა თვითმმართველობების წევრებისათვის“, საგანმანათლებლო სისტემაში მიმდინარე რეფორმების ანოტაციები, ვებ-გვერდზე ასევე ბმულების სახით განთავსთდა პროექტის ფარგლებში შექმნილი ბათუმის საჯარო სკოლის მოსწავლეთა თვითმმართველობების ვებ-ბლოგების ინტერნეტ მისამართები, ნებისმიერ მომხმარებელს შეეძლება გადართვა მოახდინოს მისთვის საინტერესო სკოლის ბლოგზე, მიიღოს დეტალური ინფორმაცია მოცემული სკოლის მოსწავლეთა თვითმმართველობის და მათ მიერ განხორციელებული აქტივობების შესახებ. მოცემული ვებ-გვერდი იქნება განახლებადი და მასზე პერმანენტულად განთავსთდება ინფორმაცია მოსწავლეთა თვითმმართველობების მიერ განხორციელებული ღონისძიებებისა და სხვადასხვა სახის ახალგაზრდული აქტივობების შესახებ.  

                                                        

      დემოკრატიის ინსტიტუტი                                                                              ევროკავშირი

პროექტი დაფინანსებულია დემოკრატიის ინსტიტუტის დაფინანსებით ევროკავშირის მხარდაჭერით მიმდინარე პროექტის ,,აჭარის რეგიონში არასამთავრობო ორგანიზაციების პოტენციალის, რესურსებისა და შესაძლებლობების განვითარება’’-ს ფარგლებში

.

პროექტის განმახორციელებელი

.

.

.

მშვიდობის კვირეული

ბათუმი 21-27 სექტემბერი 2010 წელი

21 სექტემბერი გაეროს მიერ მშვიდობის საერთაშორისო დღედ არის  გამოცხადებული,რომელიც როგორც გაეროს ეგიდით, ასევე მის წევრ სახელმწიფოებში ყოველწლიურად, ძალზედ ფართომასშტაბიანად აღინიშნება. ამ დღეს მთელი მსოფლიოს მასშტაბით ტარდება სხვადასხვა სახის კულტურული, საგანმანათლებლო, სპორტული, საინფორმაციო აქციები და ღონისძიებები, რომელთა მიზანია კონფლიქტთა მშვიდობიანი გზით გადაწყვეტის, ხალხებს შორის მეგობრული ურთიერთობების, ტოლერანტობისა და შემწყნარებლობის იდეალების პროპაგანდა, მშვიდობის საკითხებზე საზოგადოების ყურადღების მიპყრობა და მათი აქტიური ჩართვა ძალადობის წინააღმდეგ ბრძოლასა და ზოგადად მსოფლიო მშვიდობის განმტკიცების პროცესში. 2010 წელი გაეროს მიერ გამოცხადებული იყო, როგორც ახალგაზრდობის საერთაშორისო წელი. აქედან გამომდინარე განსაკუთრებული აქცენტი გაკეთდა იმ ახალგაზრდული ინიციატივების მხარდაჭერაზე, რომლებმაც ხელს შეუწყეს საზოგადოებაში ტოლერანტობისა და მშვიდობის იდეალების პროპაგანდას, ძალადობის წინააღმდეგ ბრძოლასა და დაპირსპირებულ მხარეებს შორის ნდობის ხიდის აღდგენას. გაეროს გენერალურმა მდივანმა პან გი მუნმა მოუწოდა მსოფლიოს ახალგაზრდებს გამოსულიყვნენ მშვიდობის დასაცავად, ლოზუნგით – ,,ახალგაზრდობა მშვიდობისა და განვითარებისათვის“. 2010 წელს მშვიდობის საერთაშორისო დღის აღნიშვნაში განსაკუთრებული ყურადღება გამახვილებული  იყო ახალგაზრდებზე. ასევე უნდა აღინიშნოს, რომ ასეთი აქტივობების როლი დიდია ისეთ სახელმწიფოებში, რომელთაც ახლო წარსულში შეიარაღებული კონფლიქტები გადაიტანეს და რომლებიც დღემდე რჩებიან პოტენციური საფრთხის ზონად. ამგვარად, საქართველოშიც მშვიდობის საერთაშორისო დღის აღნიშვნის ტრადიციის ჩამოყალიბება  უაღრესად მნიშვნელოვანი იყო ქვეყნისთვის.

       ყოველივე ზემოთ თქმულიდან გამომდინარე,    არასამთავრობო ორგანიზაციების ,,ჩვენი თაობა“-ს, სამოქალაქო საზოგადოების განვითარების კავშირ ,,ბორჯღალო“-ს და rsu –s (რუსთაველის სახელმწიფო უნივერსიტეტის) სტუდენტური თვითმართველობის ერთობლივი ორგანიზებით ქალაქ ბათუმში ჩატარდა ,,მშვიდობის კვირეული“. კვირეული გაიხსნა 2010 წლის 21 სექტემბერს მშვიდობის საერთაშორისო დღეს და ერთი კვირის განმავლობაში დატვირთული იყო სხვადასხვა სახის აქციებითა და ღონისძიებებით, რომლებიც მშვიდობის თემატიკას მიეძღვნა.

კვირეული ჩატარდა ლოზუნგით ,,მშვიდობა = მომავალს“ და მის ყველა აქტივობაში მონაწილეობა მიიღეს სკოლის მოსწავლეებმა და სტუდენტებმა.

პროექტის პარტნიორები იყვნენ: 

 საინფორმაციო ცენტრი ნატო-ს შესახებ-ბათუმის ბიურო;

რსუ- სოციალურ და პოლიტიკურ მეცნიერებათა დეპარტამენტი;

რუსეთის კვლევების საქართველოს ინსტიტუტის ახალგაზრდული ცენტრი.

ღონისძიებათა განრიგი

21 სექტემბერი -  სპეციალურ ,,მშვიდობის მაისურებში“ გამოწყობილმა ახალგაზრდებმა, სამშვიდობო ტრანსფარანტებით მოაწყეს მსვლელობა ქალაქში და დაარიგეს საინფორმაციო ფლაერები მშვიდობის საერთაშორისო დღის შესახებ;

22 სექტემბერი- ბათუმის ზღვისპირა პარკში, ბათუმის უმაღლეს სასწავლებლებში და სხვა დაწესებულებებში მოეწყო 2008 წლის საქართველო-რუსეთის ომის აღმბეჭდავი კადრების მოძრავი ფოტო-გამოფენა;

23 სექტემბერი-ბათუმის მეგობრობის სახლში გაიმართა პოეზიის საღამო სადაც მონაწილეობა მიიღეს ბათუმში მოღვაწე ახალგაზრდა პოეტებმა;

24 სექტემბერი- ბათუმის საჯარო სკოლებსა და უმაღლეს სასწავლებლებში ჩატარდა სოციოლოგიური კვლევა თემაზე: ,,როგორ გესმით მშვიდობა?“. მოხდა კვლევის შედეგების პრეზენტაცია და განხილვა;

25 სექტემბერი-   ბათუმის სახელმწიფო უნივერსიტეტის პროფესორებმა სკოლის მოსწავლეებსა და სტუდენტებს წაუკითხეს სალექციო კურსი თემაზე ,,მშვიდობა მსოფლიოში და საქართველოში“. წაკითხული იქნა 4 ღია ლექცია შემდეგ თემებზე:

    ა)  მშვიდობა საერთაშორისო-სამართლებრივ ასპექტში. საერთაშორისო მშვიდობა და უსაფრთხოება გაეროს საქმიანობაში, გაეროს სამშვიდობო ოპერაციები, განიარაღების საკითხი საერთაშორისო სამართალში. ლექცია წაიკითხა ლევან ჯაყელმა.

   ბ)  მშვიდობა ფილოსოფიურ-პოლიტიკურ ასპექტში. დიალოგი ცივილიზაციებსა და კულტურებს შორის, საერთაშორისო ტერორიზმი. ლექცია წაიკითხა გიორგი მასალკინმა.

   გ)  საზოგადოება მშვიდობის დაცვის სფეროში. ნობელის პრემიის ლაურიანტები მშვიდობის დარგში, ხელოვნების,  მუსიკისა და სპორტის გამოჩენილი მოღვაწეები მშვიდობის დასაცავად. გაეროს კეთილი ნების ელჩები. ლექცია წაიკითხა მურმან გორგოშაძემ.

   დ)  საქართველოში არსებული კონფლიქტების მშვიდობიანი გზით გადაწყვეტა. კონფლიქტები აფხაზეთსა და ცხინვალის რეგიონში, სახელმწიფო სტრატეგია ოკუპირებული ტერიტორიების მიმართ, ახალი გამოწვევები და პერსპექტივები. ლექცია წაიკითხა ილია გუჩმანიძემ.

26 სექტემბერი-  მოეწყო ოთარ იოსელიანის ფილმის  “ყაჩაღები“ ჩვენება და გაიმარა დისკუსია. განხილვას უძღვებოდა გიორგი მასალკინი;

27 სექტემბერი- ,,მშვიდობის კვირეული“-ს დასასრულს 27 სექტემბერს სოხუმის დაცემის დღეს ბათუმის უნივერსიტეტში შედგა მოსწავლეების, სტუდენტების, არასამთავრობო ორგანიზაციებისა და სახელისუფლო წრეების წარმომადგენლების ერთიანი შეხვედრა, წუთიერი დუმილით პატივი მიეგო ომში დaღუპული ადამიანების ხსოვნას, განიხილეს საქართველოში არსებული კონფლიქტების მშვიდობიანი გზით გადაწყვეტის პერსპექტივები, სამშვიდობო პროცესში საზოგადოების, განსაკუთრებით კი ახაგაზრდების ჩართულობის საკითხები. შეხვედრის დასასრულს მიღებული იქნა ერთობლივი კომუნიკე, სახელწოდებით – ,,მშვიდობის მესიჯი“. შეხვედრაში მონაწილეებისაგან შეიქმნა ,,მშვიდობის კორპუსი“, რომელიც კვირეულის შემდგომაც აგრძელებს შეხვედრებს და კოორდინირებულ მუშაობას სამშვიდობო პროცესში საზოგადოებრივი რესურსების მაქსიმალური რეალიზაციისათვის.

ა(ა)იპ ,,ჩვენი თაობა” გიწვევთ სათანამშრომლოდ

,,ჩვენი თაობა“ 2007 წლიდან ფუნქციონირებდა, როგორც არარეგისტრირებული კავშირი – სტუდენტური კლუბის სახით. ოფიციალურად, არაკომერციულ (არასამეწარმეო) იურიდიული პირად კი დარეგისტრირდა 2010 წლის 1 სექტემბერს. ,,ჩვენი თაობა“-ს საქმიანობის მთავარი მიზნებია: საქართველოში სამოქალაქო საზოგადოების განვითარების ხელშეწყობა, ადამიანის უფლებების დაცვა, მოქალაქეთა სამართლებრივი და კულტურული თვითშეგნების ამაღლება. ,,ჩვენი თაობა“-ს ორგანიზებით ბოლო პერიოდში განხორციელდა შემდეგი აქტივობები:

• 2010 წლის 4 სექტემბერს, სახალხო დამცველის ბათუმის ოფისში მოეწყო შეხვედრა თებაზე- ..ახალგაზრდების როლი კონფლიქტების ტრანსფორმაციის პროცესში’’. სადაც დეტალურად იქნა განხილული საქართველოს დეოკუპაციის პროცესში ახალგაზრდების ჩართულობის გზები და საშუალებები;

• 2010 წლის 21-27 სექტემბერს, რსუ-ს სტუდენტური თვითმმართველობასთან თანამშრომლობის რეჟიმში, ჩატარდა ,,მშვიდობის კვირეული’’, ლოზუნგით ,,მშვიდობა = მომავალს’’. რომელიც დატვირთული იყო სხვადასხვა სახის საგანმანათლებლო, სპორტული, საქველმოქმედო და კულტურული ღონისძიებებით;

• 2010 წლის 9-11 ოქტომბერს  ბათუმში ჩატარდა ,,კლიმატის ცვლილებების კვირეული’’, რომლის თანაორგანიზატორიც ,,კავკასიის გარემოსდაცვითი არასამთავრობო ორგანიზაციების ქსელითან“ ერთად გახლდათ ,,ჩვენი თაობა“.

• ,,შავი ზღვის დღეების“ ფარგლებში (2010 წლის 31 ოქტომბერი – 5 ნოემბერი)  ,,ჩვენი თაობა“-ს ორგანიზებით ჩატარდა სხვადასხვა სახის გარემოსდაცვითი ღონისძიებები.

,,ჩვენი თაობა’’ მჭიდროდ თანამშრომლობს აჭარის რეგიონში მოქმედ უმაღლეს სასწავლებლებთან. სხვადასხვა სამთავრობო და არასამთავრობო ორგანიზაციებთან.